భారత్-ఆఫ్ఘ‌న్ తొలి వన్డేకు వరుణుడి అడ్డంకి

ధర్మశాల వేదికగా భారత్, ఆఫ్ఘ‌నిస్థాన్ జట్ల మధ్య ప్రారంభం కావాల్సిన తొలి వన్డేకు వరుణుడు అడ్డుపడ్డాడు. హిమాచల్ ప్రదేశ్ క్రికెట్ అసోసియేషన్ (హెచ్‌పీసీఏ) స్టేడియంలో ఎడతెరిపి లేకుండా వర్షం కురుస్తుండటంతో టాస్ ఆలస్యమైంది. ఈ విషయాన్ని బీసీసీఐ తన అధికారిక ఎక్స్ ఖాతా ద్వారా ధ్రువీకరించింది. మ్యాచ్ ప్రారంభానికి ముందు నుంచే వర్షం కురుస్తుండటంతో అభిమానులు నిరాశకు గురయ్యారు.

గత రెండు రోజులుగా ధర్మశాలలో వర్షాలు కురుస్తున్నాయి. మ్యాచ్‌కు ముందు రోజు కూడా ఇదే పరిస్థితి కొనసాగింది. వాతావరణ శాఖ అంచనాల ప్రకారం సాయంత్రం 4:30 గంటల వరకు వర్షం పడే అవకాశం ఉంది. ఆ తర్వాత వాతావరణం మెరుగుపడొచ్చు. అయితే, వర్షం పూర్తిగా ఆగిపోయిన తర్వాత మైదానంలోని డ్రైనేజీ వ్యవస్థ పనితీరుపై, సిబ్బంది గ్రౌండ్‌ను సిద్ధం చేసే సమయంపైనే మ్యాచ్ ప్రారంభం ఆధారపడి ఉంటుంది.

2027 వన్డే ప్రపంచకప్‌కు సన్నాహాల్లో భాగంగా ఈ సిరీస్ టీమిండియాకు అత్యంత కీలకం. ఈ మ్యాచ్‌కు శుభ్‌మన్ గిల్ కెప్టెన్‌గా వ్యవహరిస్తుండగా, స్టార్ బ్యాటర్ విరాట్ కోహ్లీ, ఆల్ రౌండర్ హార్దిక్ పాండ్యా గాయాల కారణంగా దూరమయ్యారు. అయితే, సీనియర్ ఓపెనర్ రోహిత్ శర్మ బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో ఫిట్‌నెస్ పరీక్షలో నెగ్గి, జట్టుతో చేరాడు. అతను గిల్‌తో కలిసి ఇన్నింగ్స్ ఆరంభించనున్నాడు.

విరాట్ కోహ్లీ గైర్హాజరీతో ఈ సిరీస్‌లో 3వ నంబర్ బ్యాటింగ్ స్థానం కోసం ప్రయోగాలు చేసేందుకు టీమ్ మేనేజ్‌మెంట్ సిద్ధంగా ఉందని భారత బౌలింగ్ కోచ్ మోర్నీ మోర్కెల్ తెలిపాడు. ఈ స్థానం కోసం కేఎల్ రాహుల్, యశస్వి జైస్వాల్, ఇషాన్ కిషన్ పోటీలో ఉన్నారు. ధర్మశాల పిచ్ సాధారణంగా ఫాస్ట్ బౌలర్లకు అనుకూలిస్తుంది. దీనికి తోడు వర్షం కారణంగా పిచ్‌పై తేమ చేరడంతో టాస్ మరింత కీలకంగా మారింది. ఒకవేళ మ్యాచ్ నిడివిని కుదిస్తే, టాస్ గెలిచిన జట్టు ఫీల్డింగ్ ఎంచుకునే అవకాశం ఉంది.

గత రికార్డులను పరిశీలిస్తే, ఆఫ్ఘ‌నిస్థాన్‌పై వన్డేల్లో భారత్‌ 3-0 ఆధిక్యం ఉంది. 2018 ఆసియా కప్‌లో జరిగిన ఒక మ్యాచ్ మాత్రం టైగా ముగిసింది.